រាជរដ្ឋាភិបាល បានលុបឡូត៍នេសាទលេខ៤ ដែលមានទំហំសរុប២.៣២៥ហ.ត មានទីតាំងស្ថិតនៅក្នុង ឃុំកំពង់ភ្លុក ស្រុកប្រាសាទបាគង ខេត្តសៀមរាប ដោយយោងតាមអនុក្រឹត្យលេខ ៣៧អនក្រ.បក ចុះថ្ងៃទី០៧ ខែមីនា ឆ្នាំ២០១២ ស្តីពីការលុបឡូត៍នេសាទជុំវិញបឹងទន្លេសាប សម្រាប់ទុកឲ្យប្រជាពលរដ្ឋធ្វើនេសាទ ជាលក្ខណៈគ្រួសារ និងជាកន្លែងអភិរក្សជលផល។ ចាប់ពីថ្ងៃទី២៦កុម្ភៈ ដល់ថ្ងៃទី០៤ ខែមីនា មន្ត្រីផ្នែករដ្ឋបាលជលផលចុងឃ្នៀស និងសង្កាត់រដ្ឋបាលជលផលភ្នំក្រោម បានសហការជាមួយប្រជានេសាទ សរុបចំនួន១៦នាក់ ដើម្បីសាងសង់រោងយាម ដែលមានទំហំ ទទឹង៥ម បណ្តោយ៩ម និងកំពងស់២,៥ម សង់ពីឈើ ប្រក់ស្លឹក ដើម្បីផ្តល់ភាពងាយស្រួលដល់កម្លាំងយាមល្បាតប្រចាំការ នៅកន្លែងអភិរក្សជលផលអតីតឡូត៍នេសាទ ចំនួន៤កន្លែង រួមមាន កន្លែងអភិរក្សជលផលអតីតឡូត៍នេសាទលេខ៤ (ទំហំ៩៨៦ហ.ត) កន្លែងអភិរក្សជលផល តាម៉ោកនៃអតីតឡូត៍នេសាទលេខ៦ (ទំហំ៨៧ហ.ត) កន្លែងអភិរក្សជលផលផ្ទោលស្រោង នៃអតីតឡូត៍ នេសាទលេខ៧ (ទំហំ៩៦២ហ.ត) និងកន្លែងអភិរក្សជលផលដែនបំរុងរដ្ឋ (ទំហំ៦.៤០០ហ.ត)។ ពិសេសទៅទៀត បន្ទាប់ពីសាងសង់រោងយាមរួចហើយ កម្លាំងផ្នែក និងសង្កាត់រដ្ឋបាលជលផល បានបោះបង្គោលឈើ និងចងទង់ព័ណ៌ក្រហម ជាសញ្ញាសម្គាល់តាមព្រំប្រទល់កន្លែងអភិរក្សជលផល ដើម្បីឲ្យប្រជានេសាទស្គាល់ព្រំប្រទល់ច្បាស់លាស់ និងចរាចរណ៍កាណូតតាមផ្លូវទឹកកុំឲ្យបើកបរឆ្លងកាត់កន្លែងអភិរក្សនៅរដូវប្រាំង។ នៅថ្ងៃទី០៥ ខែមីនា ឆ្នាំ២០១៩ រោងយាមល្បាតនេះ ត្រូវបានជូនដល់ក្រុមល្បាតចំនួន៤នាក់ សម្រាប់ស្នាក់នៅ និងប្រចាំការយាមល្បាតកន្លែងអភិរក្សជលផល ក្នុងគោលបំណង គឺដើម្បីពង្រឹងការងារអភិរក្សត្រីមេពូជនៅក្នុងដែននេសាទ ដើម្បីឲ្យមានការបន្តពូជ និងសាយភាយពូជត្រីនៅក្នុងបឹងធម្មជាតិ និងជួយលើកស្ទួយជីវភាពរស់នៅរបស់ប្រជាពលរដ្ឋតាមរយៈការនេសាទជាលក្ខណៈគ្រួសារ។
រក្សាសិទិ្ធគ្រប់យ៉ាងដោយ ក្រសួងកសិកម្ម រុក្ខាប្រមាញ់ និងនេសាទ
រៀបចំដោយ មជ្ឈមណ្ឌលព័ត៌មាន និងឯកសារកសិកម្ម