ថ្ងៃច័ន្ទ ៣កើត ខែពិសាខ ឆ្នាំកុរ ឯកស័ក ព.ស ២៥៦២ ត្រូវនឹងថ្ងៃទី០៦ ខែឧសភា ឆ្នាំ២០១៩ លោក-លោកស្រី ដែលជាថ្នាក់ដឹកនាំការិយាល័យកសិកម្ម ក្រុង-ស្រុក ទាំង១២   រួមជាមួយមន្ត្រីថ្នាក់ខេត្ត នៃមន្ទីរកសិកម្ម រុក្ខាប្រមាញ់ និងនេសាទខេត្តសៀមរាប សរុបចំនួន១៥នាក់ បានអញ្ជើញទៅចូលរួមសិក្ខាសាលា ស្តីពីការប្រមូល និងប្រើប្រាស់ទិន្នន័យស្ថិតិកសិកម្ម ដល់មន្ត្រីថ្នាក់ខេត្ត-ស្រុក ដែលប្រព្រឹត្តទៅនៅសណ្ឋាគារប្រេស៊ីដង់ ខេត្តបាត់ដំបង រយៈពេល៥ថ្ងៃ ។ សិក្ខាសាលានេះរៀបចំឡើងដោយ នាយកដ្ឋានផែនការ ស្ថិតិ នៃក្រសួងកសិកម្ម រុក្ខាប្រមាញ់ និងនេសាទ ក្រោមអធិបតីភាព លោក ម៉ក់ មូនី ប្រធាននាយកដ្ឋានផែនការ ស្ថិតិ ,លោកស្រី មាស សុទ្ធាវី អនុប្រធាននាយកដ្ឋានផែនការ ស្ថិតិ និងលោក មែន សុទ្ធី ប្រធានការិយាល័យផែនការ ស្ថិតិ ដែលការអញ្ជើញចូលរួមពីសំណាក់លោក- លោកស្រី ជាមន្ត្រីថ្នាក់ខេត្ត ថ្នាក់ស្រុកក្នុងមន្ទីរកសិកម្ម រុក្ខាប្រមាញ់ និងនេសាទខេត្ត ចំនួន៥ ក្នុងនោះរួមមាន ខេត្តសៀមរាប កណ្តាល ព្រះវិហារ ឧត្តរមានជ័យ និងខេត្តកំពង់ធំ សរុបចំនួន៥០នាក់ (ស្រី៧នាក់)។

គោលបំណងសំខាន់ៗ​របស់សិក្ខាសាលានេះគឺ៖
១).ការយល់ដឹងពីគោលនយោបាយ និងផែនការយុទ្ធសាស្ត្រអភិវឌ្ឍន៍វិស័យកសិកម្ម
២).ការណែនាំពីស្ថិតិកសិកម្ម និងការប្រមូលទិន្នន័យកសិកម្ម
៣).ស្តីពីការរៀបចំទិន្ន័យ និងការប្រើប្រាស់ទិន្នន័យក្នុងវិស័យកសិកម្ម
៤).ការពិភាក្សា ផ្ទៀងផ្ទាត់ទិន្នន័យ និងបញ្ហាប្រឈមនានា ក្នុងការអនុវត្ត និងប្រើប្រាស់។