ថ្ងៃសុក្រ៤រោច ខែមិគសិរ ឆ្នាំជូតទោស័កព.ស ២៥៦៤ ត្រូវនិងថ្ងៃទី៤ ខែធ្នូ  ឆ្នាំ ២០២០ លោក  ហៃ  វាសនា  អនុប្រធានមន្ទីរ  កសិកម្មរុក្ខាប្រមាញ់  និង  នេសាទ  ខេត្តសៀមរាប  បាននាំយកវិញ្ញាបនបត្រនៃការអនុវត្តកសិកម្មល្អ របស់អគ្គនាយកដ្ឋានកសិកម្ម នៃក្រសួងកសិកម្ម រុក្ខាប្រមាញ់ និងនេសាទ ជូនដល់កសិករឈ្មោះ លន សាវុធ រស់នៅភូមិពពិស សង្កាត់ក្របីរៀល ក្រុងសៀមរាប។លោកលន សាវុធ ជាអ្នកដាំបន្លែជាយូរឆ្នាំមកម៉្លេះ ហើយបានចាប់ផ្តើមការដាំបន្លែសុវត្តិភាពក្នុងផ្ទះសំណាញ់ចាប់ពីដើមឆ្នាំ២០១៩។ គាត់ជាកសិករក្នុងបណ្តុំអាជីវកម្មបន្លែសុវត្តិភាពភូមិគោកដូង នៃកម្មវិធីASPIRE និងបានទទួលផ្ទះសំណាញ់សម្រាប់ដាំបន្លែចំនួន០១ខ្នង ទំហំ១០ម៉ែត្រx៣៦ម៉ែត្រ ពីមន្ទីរកសិកម្ម រុក្ខាប្រមាញ់ និងនេសាទខេត្តសៀមរាប ក្នុងកម្មវិធីផ្សព្វផ្សាយបច្ចេកទសកសិកម្មថ្មីដែលធន់ទ្រាំនិងការប្រែប្រួលអាកាសធាតុ (ASPIRE) ឆ្នាំ២០១៩ និងបានសាងសងដោយថវិកាផ្ទាល់ខ្លួនចំនួន៣ខ្នងទៀត។ លើផ្ទះដីប្រមាណ៥ ០០០ម៉ែត្រការ៉េគាត់ដាំភាគច្រើនជាប្រភេទបន្លែស្លឹកមានដូចជា៖ ប្រភេទសាលាដ ស្ពៃចង្គឺះ ស្ពៃក្រញាញ់ ស្ពៃជើងទា ខាត់ណាដើម ខ្ទឹមស្លឹក...។ល។ សម្រាប់ផ្គត់ផ្គង់នៅផ្សារទំនើម ផ្សារបន្លែសុវត្តិភាពចុងសប្តាហ៍ នៅក្នុងក្រុងសៀមរាប។ 
បន្ទាប់ពីមើលឃើញកិច្ចខិតខំរបស់គាត់ក្នុងវិស័យកសិកម្ម ដើម្បីបង្កើនផលិតផលបន្លែសុវត្តិភាពលើទីផ្សារក្នុងខេត្តសៀមរាប មន្ទីរកសិកម្ម រុក្ខាប្រមាញ់ និងនេសាទខេត្តសៀមរាប បានអញ្ជើញក្រុមការងារនៃអគ្គនាយកដ្ឋានកសិកម្មចុះមកពិនិត្យទីតាំង និងការងារដាំដុះរបស់កសិករលន សាវុធ រួចមក បានបញ្ជាក់ថាពិតជាបានបំពេញគ្រប់លក្ខខណ្ឌតម្រូវការនៃការចុះបញ្ជីកសិដ្ឋាន ឬចំការអនុវត្តកសិកម្មល្អកម្ពុជាស្របតាមប្រកាសលេខ០៩៩ប្រក.កសក ស្តីពីការដាក់ឲ្យប្រើប្រាស់វិធានការនៃការអនុវត្តកសិកម្មល្អក្នុងការងារផលោតកម្មផ្លែឈើ និងបន្លែស្រស់។ 
កសិករ លន សាវុធ ក្រោយពីទទួលបានវិញ្ញាបនប័ត្រនេះ គាត់មានចិត្តសប្បាយរីករាយ ដោយសារការមើលឃើញការខិតខំរបស់គាត់ពីមន្ទីរ និងក្រសួងកសិកម្ម រុក្ខាប្រមាញ់ និងនេសាទ ក្នុងការលើកកម្ពស់បន្លែសុវត្ថិភាព ឲ្យឈានទៅរកការលុបបំបាត់ការប្រើប្រាស់ជី-ថ្នាំកសិកម្ម។