នាព្រឹកថ្ងៃអង្គារ៤រោចខែផល្គុន ឆ្នាំជូត ទោស័ក ព.ស២៥៦៤ ត្រូវនឹងថ្ងៃទី០២ខែមីនា ឆ្នាំ២០២១ លោក ប៉ែន ប៊ុនធឿន អនុប្រធានមន្ទីរតំណាងលោក ប្រធានមន្ទីរ និងជាតំណាងឯកឧត្តមប្រធានគណះកម្មាធិការសមាគមមិត្តបុគ្គលិកកសិកម្មកម្ពុជា  និងលោកឡាយ គិមលាង ប្រធានការិយាល័យរដ្ឋបាល-បុគ្គលិក លោក សឹម ធរដ្ឋ អនុប្រធានការិយាល័យបសុព្យាបាល លោក សួន គង់សុភារិទ្ធ អនុផ្នែកបូកសរុប និងកញ្ញា ថាច់ ណារីផល មន្ត្រីកិច្ចសន្យា ព្រម​ទាំង​លោក ទិត សុខុម មេភូមិ​ត្រពាំងសេះ តំណាងអជ្ញាធរមូលដ្ឋានបានចូល​រួមពិធីប្រគល់​ថវិកា​អំណោយឧបត្ថម្ភរបស់ឯកឧត្តមប្រធានគណៈកម្មាធិការសមាគមមិត្តបុគ្គលិកកសិកម្មកម្ពុជា ជូនគ្រួសារ​សព​លោក សួង រី អតីតប្រធានការិយាល័យ​កសិកម្ម​ស្រុកវ៉ារិន នៃមន្ទីរកសិកម្មរុក្ខាប្រមាញ់ និងនេសាទខេត្តសៀមរាប ចំនួន ៦ ០០០ ០០០រៀល និងអំណោយលោកប្រធានមន្ទីរ មានអង្ករ ៥០គក្រ មី០១កេស ទឹកសុទ្ធ០១កេស ទឹកត្រី០១យួរ និងទឹកស៊ីអ៊ីវ០១​យួរ ព្រមទាំងថវិកាដែលសព លោក សួង រី នៅជំពាក់សមាគមចំនួន ១៤៦ ០០០រៀល សម្រាប់ចូលបុណ្យ១០០ថ្ងៃផងដែរ នៅគេហដ្ឋានគ្រួសារសព ភូមិត្រពាំងសេះ សង្កាត់គោកចក ក្រុងសៀមរាប។ លោកប៉ែន ប៊ុនធឿន អនុប្រធានមន្ទីរ បានអានសាររំលែកទុក្ខរបស់ក្រសួងកសិកម្ម រុក្ខាប្រមាញ់ និងនេសាទ ជូនដល់គ្រួសារនៃសពរួចមក លោកស្រីគិត សេងហាក់ ត្រូវជាភរិយាសពបានធ្វើសេចក្តីថ្លែងអំណរគុណ និងដឹងគុណយ៉ាងជ្រាលជ្រៅដល់ ឯកឧត្តមប្រធាន លោកប្រធានមន្ទីរ និងសហការី ដែលមាននាំយកថវិកា និងសម្ភារៈមួយចំនួនមកប្រគល់ជូនដល់់ផ្ទះ ដែលអាចជួយរំលែកទុក្ខលំបាកដល់គ្រួសារសពបានមួយកំរិតផងដែរ៕