សៀមរាប៖ លោកទា គឹមសុទ្ធ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តសៀមរាប លោកធិននី សុទ្ធី នាយខណ្ឌរដ្ឋបាលជលផល លោក លី សូផា នាយរងផ្នែករដ្ឋបាលព្រៃឈើបន្ទាយស្រី បានយកសត្វអណ្តើករស់ចំនួន១៧០ក្បាល ទៅព្រលែងនៅកន្លែងអភិរក្សជលផលបឹងពារាំង សង្កាត់ជ្រាវ ក្រុងសៀមរាប មានការចូលរួមពីលោក ហាយ យង់ អភិបាលរងនៃគណៈអភិបាលក្រុងសៀមរាប លោកសោម សុវណ្ណ នាយរងអធិការដ្ឋានរដ្ឋបាលជលផលខាងជើងបឹងទន្លេសាប កងរាជអាវុធហត្ថលើផ្ទៃប្រទេស អង្គការសម្ព័ន្ធសត្វព្រៃWildlife Alliance មន្ត្រីមន្ទីរបរិស្ថានខេត្ត គណៈកម្មការសហគមន៍នេសាទចុងឃ្នៀស និងសមាគម សហគមន៍ ទេសចរណ៍ វប្បធម៌ ធម្មជាតិបឹងពារាំង។  ចំណែកសត្វក្អែកទឹកតូចរស់ចំនួន ៦០ក្បាល មាន់ទឹករស់ចំនួន០១ក្បាល បានប្រគល់ជូនក្រុមអន្តរាគមន៍បង្ក្រាបបទល្មើសសត្វព្រៃចល័តយកទៅរក្សាទុកនៅសួនសត្វភ្នំតាម៉ៅ ខេត្តតាកែវ។ សូមបញ្ជាក់ថាសត្វទាំងបីប្រភេទខាងលើ ក្រុមការងារមន្ទីរកសិកម្មខេត្តសៀមរាប សហការជាមួយក្រុមអន្តរាគមន៍បង្ក្រាបបទល្មើសសត្វព្រៃចល័យ និងលោកប៉ុក តារា ព្រះរាជ្ញារងនៃអយ្យការអមសាលាដំបូងខេត្តសៀមរាប បានចុះទៅដកហូតពីឈ្មោះ ម៉ៃ រតនា ភេទប្រុស ស្ថិតនៅភូមិស្ពានជ្រាវ សង្កាត់សៀមរាប ក្រុងសៀមរាប ខេត្តសៀមរាប ។