សៀមរាប៖ ថ្ងៃពុធ១កើត ខែមេឃ  ឆ្នាំរោង ឆស័កព.ស២៥៦៨ ត្រូវនឹងថ្ងៃទី២៩ ខែមករា ឆ្នាំ២០២៥ លោក ទា គឹមសុទ្ធ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តសៀមរាប លោកហៃ វាសនា អនុប្រធានមន្ទីរ និងមន្ត្រីបច្ចេកទេសជូនដំណើរលោកជំទាវ ងិន សូនាថ អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ ដោយមានការចូលរួមពីលោកស្រី ភូ និមល តំណាងរដ្ឋបាលស្រុកជីក្រែង អាជ្ញាធរភូមិ ឃុំ មន្ត្រីកសិកម្មឃុំ  ចុះពិនិត្យស្ថានភាពប្រមូលផលស្រូវប្រាំង ការលក់ដូរស្រូវ និងការសង្គ្រោះស្រូវប្រាំង ដែលកំពុងប្រឈមនិងការខ្វះទឹកចំនួនជាង ៥០០ហិកតា នៅឃុំស្ពានត្នោត ស្រុកជីក្រែង។ នៅក្នុងឪកាសនេះ លោកជំទាវ បានពន្យល់បំភ្លឺអំពីបញ្ហាតម្លៃស្រូវដែលបានធ្លាក់ចុះជាងឆ្នាំមុន និងបានផ្សព្វផ្សាយពីសារៈសំខាន់នៃការចូលរួមចងក្រងជាសហគមន៍កសិកម្មទំនើបផងដែរ។ បន្តមកទៀតក្រុមការងារបានចុះពិនិត្យទីតាំងដែលកំពុងបូមទឹកនៅអាងទឹកទំនប់ម្កាក់ ដើម្បីសង្គ្រោះដំណាំស្រូវលើផ្ទៃដីចំនួនជាង៥០០ហិកតា និងបានណែនាំដល់មន្ត្រីជំនាញឱ្យយកចិត្តទុកដាក់ខ្ពស់តាមដានលើបញ្ហានេះឱ្យបានជាប្រចាំ។ បន្ថែមលើនេះ លោកជំទាវ បានចុះជួបសំណេះសំណាលជាមួយអាជីវករលក់ធាតុចូលដូចជាជីថ្នាំកសិកម្មនៅដេប៉ូ របស់លោក ទេព ប៊ុនធន់ ឃុំកំពង់ក្តី ស្រុកជីក្រែង។ លោកជំទាវ ងិន សូនាថ បន្តចុះមកជួបសំណេះសំណាលជាមួយកសិករនៅក្នុងសហគមន៍កសិកម្មសុវត្ថិភាពធម្មជាតិ ដែលធ្វើកសិកម្មចម្រុះមានស្រូវ បន្លែ ចិញ្ចឹមសត្វ និងការសន្សំប្រាក់ នៅឃុំកៀនសង្កែ ស្រុកសូទ្រនិគម ដើម្បីផ្សព្វផ្សាយពីសារៈសំខាន់នៃការចូលរួមចងក្រងជាសហគមន៍កសិកម្មទំនើប ដែលមានការចូលរួមពីថ្នាក់ដឹកនាំ និងសមាជិករបស់សហគមន៍ចំនួន ១៥នាក់។